Richa Adhia aula tena?

MISS Tanzania 2007, Richa Adhia kwa mara nyingine tena ataipeperusha bendera ya Tanzania katika shindano la kumsaka mrembo wa dunia mwenye asili ya Asia 'Miss World 'itakayofanyika Machi 27 kwenye ukumbi wa International Convention Centre mjini Durban, Afrika Kusini. Shindano hilo ambalo ni la 19 kufanyika tangu kuanzishwa kwake, Tanzania inashiriki kwa mara ya kwanza ikiwa imedhaminiwa na Kampuni ya Samsung na kuzinduliwa usiku wa kuamkia jana kwenye ukumbi wa hoteli ya New Afrika, jijini Dar es Salaam. Akizungumza wakati wa uzinduzi huo mratibu wa Miss India Tanzania, Sati Gadhvi alisema shindano hilo linatoa fursa kwa wanawake wa kitanzania wenye asili ya Kihindi kuweza kushindana kuonyesha urembo na vipaji vyao na mshindi ataiwakilisha Tanzania kwenye shindano la Miss World India. "Mshindi wa Samsung Miss Tanzania India mbali na kuitangaza Tanzania kimataifa pia atajihusisha na shughuli za kijamii ikiwa na pamoja na kuchangisha fedha zitazotumika kutoa misaada mbalimbali kwa jamii ya Kitanzania." alisema Sati Gadhvi "Kwa vile tumeanza mwaka huu tumeamua kumteua Richa akaiwakilishe Tanzania katika mashindano hayo, lakini kuanzia mwakani tutakuwa na mchakato wa kumsaka mrembo kuanzia ngazi ya chini mpaka taifa, kadri siku zitakavyoenda tutafanya kwa nchi nzima."