Mauaji Musoma mganga aongezwa

Kesi ya mauji ya kikatili ya watu 17 wa ukoo mmoja imechukua sura mpya baada ya mtu anayesadikiwa kuwa mganga wa kienyeji kuunganishwa kesi ya mauaji inayowakabili watuhumiwa wengine 18. Mganga huyo ambaye ni mwanamke pekee katika kesi hiyo, alitajwa kuwa ni Mariam Sivanus Masatu, anadaiwa kufanikisha mipango ya mauaji hayo. Masatu jana alipandisha kizimbani kwa mara ya kwanza na kusomewa shitaka la kushiriki katika mauaji hayo yaliotokea usiku wa Februari 16, mwaka huu katika eneo la Buhare, nje kidogo ya Manispaa ya Musoma. Mwendesha Mashitaka, Mrakibu wa Polisi, Gabriel Bonanza, alidai mahakama hiyo mbele ya Hakimu Mkazi Mfawidhi, Husen Mushi, kuwa kufikishwa mahakamani kwa mtuhumiwa huyo kunaongeza idadi ya kutoka 19 hadi 20, ingawa alisema mtuhumiwa mmoja kati yao amefariki dunia hivyo kubakia watuhumiwa 19. Alimtaja mtuhumiwa aliyefariki kuwa ni Daudi Nyamagati Makika huku akiitaarifu mahakama kuwa mtuhumiwa mwingine, Bundara Ikaka, alishindwa kufika mahakamani jana kutokana na kuwa mgonjwa na kwamba amelazwa katika Hospitali ya Mkoa wa Mara. Wathumiwa hao hawakutakiwa kujibu chochote dhidi ya mashitaka 17 ya mauaji na matatu ya kujaribu kuua ambayo yanawakabili. Walirejeshwa rumande hadi Aprili 14, mwaka huu. Polisi wengi walimwagwa kuimarisha ulinzi ili kuepusha uwezekano wa watuhumiwa hao kushambuliwa na watu wenye hasira. Wakazi wengi wa manispaa ya Musoma walijitokeza kuwashuhudia watuhumiwa wakiingia mahakamani. Hati ya mashitaka iliyosomewa watuhumiwa hao, ilidaiwa kuwa watuhumiwa hao waliwaua watu 17 kwa kukusudia wakati wakijua ni kosa. Watuhumiwa katika kesi hiyo ni Marwa Mau Mgaya (16), Matiko Mgasa, Juma Mgaya, Juma Kinonko, Daudi Nyamagati, ambaye ni marehemu, Aloyce Nyakumu, Bahati Simeo, Nyakangara Wambura na Nyakangara Masemere. Wengine ni Kumbata Alphonce, Alphonce Nyabugimbi, Sodaki Alphonce, Mikindo Mgendi, Mole Magesa, Vedastus Nyangeta na Sospiter Mbita, ambaye ni mwalimu wa Shule ya Nsingi Kukirango Usiku wa Februari 16 mwaka huu katika mtaa wa Bugaranjabho watu wasiofahamika walivamia familia tatu za ukoo mmoja na kuwaua kwa kuwachinja na kuwaatakata mapanga watu 17 wakiwemo watoto wachanga kwa kile kilichadaiwa ni ulipizaji wa visasi.